Праградина е сместена длабоко во недопрените предели на планината Кожуф, каде природата сè уште зборува на јазикот на древните доблести.

Овој мал планински агроекосистем и пчеларско прибежиште не е деловен потфат. Сè што создаваме најнапред произлегува од нашите сопствени потреби. Дури потоа, она што природата великодушно го дарува како вишок, го споделуваме со пошироката заедница.

Водата, земјата, воздухот и шумата во Праградина нудат погодни услови и околина за човечкиот оган да може мирно да тлее во огништето. И тоа не со цел да ја покорува природата, туку за да ја облагородува и да живее во согласност со неа.

Нашиот пат започна со три едноставни и длабоки вредности:

• спокојство,
• скромност,
• одмереност.

Веруваме дека токму овие доблести му овозможуваат на човекот повторно да го најде своето место во природниот поредок.

Преселбата во планината нѝ овозможи секојдневно да учиме од природата и постепено да изградиме дом во кој човекот не се спротивставува на природните закони, туку се труди да ги разбере и да живее според нив.

Тоа искуство сакаме да го споделиме и со другите.

Затоа веруваме дека вистинската економија не започнува со профитот, туку со грижата за домот: за земјата, водата, шумата, животните и луѓето.

Во Праградина се трудиме да живееме токму според ова начело.

Да земаме од природата само онолку колку што можеме чесно да ѝ вратиме.

Да ја оставиме земјата побогата отколку што сме ја затекнале.

Нашата главна дејност е органското и одржливо пчеларство. Но пчелите се само почеток на една многу поголема приказна.

Целиот имот е обликуван според принципите на пермакултурниот дизајн и агрошумарството. Секој елемент е поставен така што го поддржува животот на останатите.

Терасите создаваат поволна микроклима. Овошните дрвја обезбедуваат нектар и полен за пчелите. Пчелите ги опрашуваат овошките и ја зголемуваат нивната плодност. Лековитите и зачинските билки ја збогатуваат биолошката разновидност и придонесуваат за здравјето на пчелите и луѓето. Мешунките ја збогатуваат почвата со азот, создавајќи подобри услови за развој на останатите растенија.

Под земјата, мицелиумот ги поврзува растенијата во сложена мрежа на живот. Над земјата, инсектите, птиците, животните и човекот стануваат дел од истиот природен тек.

Од нив учиме како се создава заедница, како се работи со трпение, како секој има свое место и како заедничкото добро секогаш е поголемо од личната корист.

Со својата неуморна работа тие го поврзуваат целиот агроекосистем: ги облагородуваат растенијата, ги хранат шумите, овоштарниците и ливадите и нè потсетуваат дека вистинскиот напредок секогаш се создава преку соработка.

Пчелите нè научија секоја обична човечка фарма, градина или саксија да ги гледаме со други очи и би сакале тоа да го направат и за Вас.

Би сакале што повеќе луѓе да ја искусат оваа хармонија и да дојдат до ова сознание, за колку што е можно, тоа да нѝ помогне светот повторно да го направиме поблизок до мудроста на природата.

Праградина е жив екосистем, дом и заедница во кои човекот повторно учи да живее како дел од природата, а не над неа.